Rafbækur

Heimur rafbóka

Rafbækur á borð við þær sem hægt er að búa til í Book Creator geta glætt stærðfræðina lífi.

Til viðbótar við texta og dæmi þá geta rafbækur innihaldið myndbönd, hlekki á vefsíður og gagnvirkt efni. Nemendur unnið í eða búið til sína eigin rafbók með glósum, hugtakakortum og útskýringum.

Hér má nálgast stutt myndband á íslensku sem sýnir fyrstu skrefin í gerð rafbóka.

Tilbúin rafbók

Með því að smella á rafbókina hér til hliðar má sjá dæmi um hvernig rafbókarformið er nýtt í stærðfræðinámi og -kennslu.

Neðar á síðunni eru hugmyndir að verkefnum þar sem nemendur vinna sína eigin rafbók.

Hringurinn

Notið Book Creator í spjaldtölvu eða vefsíðu Book Creator til að búa til ykkar eigin rafbók.

Rafbókin þarf að lágmarki að:

innihalda á einni síðu mynd eða mynstur sem þið búið til sjálf (handteiknið eða teiknið í tölvuforriti) þar sem hringur hefur veigamikið hlutverk.
hafa stutta skýringu á hvað π (pí) er og aðeins um sögu þess.
innihalda útskýringu á hvernig reikna má flatarmál hrings. Því þarf að fylgja tvö ólík sýnidæmi en útfærsla á þeim er í höndum nemenda. Hægt er að skrifa dæmi og útreikninga beint inn í rafbókina, taka upp eigið kennslumyndband og setja inn eða útbúa kynningu með t.d. PowerPoint eða Nearpod.
innihalda útskýringu á hvernig reikna má ummál hrings. Því þarf að fylgja tvö ólík sýnidæmi en útfærsla á þeim er í höndum nemenda.
hafa a.m.k. eina þraut þar sem hringurinn kemur við sögu.
hafa gagnvirka skýringu sem sýnir hvernig flatarmál hrings breytist eftir því sem geisli hringsins stækkar eða minnkar. Hér má leita að gagnvirku efni sem til er á netinu t.d. tilbúin verkefni á vef GeoGebru eða útbúa sitt eigið GeoGebru-verkefni sem sýnir tengslin.

Almenn brot

Notið Book Creator í spjaldtölvu eða vefsíðu Book Creator til að búa til ykkar eigin rafbók.

Rafbókin þarf að lágmarki að:

innihalda hugarkort sem þið hannið og setjið upp sjálf. Hægt er að nota t.d. Bubbl.us til að setja upp hugarkortið og setja tengil eða skjáskot af því inn í rafbókina.
innihalda útskýringu frá ykkur (texti, eigið myndband, Nearpod-skýring ...) á því hvað það merkir að lengja eða stytta brot og sýnidæmi um hvernig það er gert.
innihalda tengil á leik eða forrit sem sýnir tengsl milli almennra brota og tugabrota.
sýna uppskrift að köku. Sýna þarf uppskrift fyrir eina köku (kallið það heila uppskrift) og svo uppskriftina þegar búið er að minnka hana þannig að baka skal 3/4 af heilli uppskrift. Myndir eða myndband af bakstri þarf að fylgja.
hafa gagnvirka skýringu sem sýnir tengsl almennra brota við prósentur. Hér má leita að gagnvirku efni sem til er á netinu t.d. tilbúin verkefni á vef GeoGebru eða útbúa sitt eigið GeoGebru-verkefni sem sýnir tengslin.

Prósentur

Notið Book Creator í spjaldtölvu eða vefsíðu Book Creator til að búa til ykkar eigin rafbók.

Rafbókin þarf að lágmarki að:

sýna að minnsta kosti tíu fyrirsagnir úr fréttamiðlum og vísun á fréttirnar þar sem prósentur koma fyrir til að styðja við eða útskýra fréttina.
hafa þrjú eða fleiri dæmi og lausnir við þeim en öll dæmin verða að tengjast raunverulegum viðfangsefnum úr daglegu lífi.
vera eigið myndband eða kynningu (sem er t.d. unnin í PowerPoint eða Nearpod) sem útskýrir hvað breytiþáttur er og hvernig hann er notaður við að reikna hækkun eða lækkun.
hafa hugtakavegg þar sem er að finna ykkar útskýringar á þeim hugtökum sem þið þekkið og tengjast prósentum. Þar má einnig setja gagnlegar reglur sem nýtast við útreikninga á verkefnum sem reyna á prósentureikninga. Hugtakavegginn má t.d. útbúa með Padlet og setja inn í rafbókina skjáskot af honum eða tengil sem vísar á hann.
sýna niðurstöður skoðunarkönnunar sem þið framkvæmið og skulu niðurstöður settar fram og sýna hlutfallstíðni í töflu og myndriti.